ARRATIAN LAN ETA BIZI BILGUNEAK BATZAR ZABALA BURUTUKO DAU

         Arratian lan eta bizi eskualdeko eragile sozial, sindikatu eta norbanakoen bilgunea da; inguruan bizi dogun egoera soziekonomiko latzaren aurrean eragiteko sortua.  Otsailaren 27an aurkezpeneko batzar zabala burutuko da Igorreko Kultur Etxean, 19:00etatik aurrera.

Arratian LAN eta BIZI

Gure eskualdean behar egin eta bizitzea, horixe da gura doguna. Kalitateko enplegu duina behar dogu patxadazko bizimodua izateko. Gure eskuen eta buruen indarra baino ez daukagu bizitzeko. Eta orain, gero eta gatxago daukagu. Beste leku askotan antzera, langabezia gora doa gurean, enpresa itxierak, kaleratzeak... Arriskuan ipinten daben bertakoon etorkizuna eta bizitza proiektua. Sektore publikoa be, aberastasunaren berbanaketarako tresna eta enplegu sortzaile izan beharrean, enplegua suntsitzen dabil, eta zerbitzuak murrizten.

Enplegua deukienak be gero eta okerrago dagoz, bildurraren txantajepean geldi, soldatak izoztu edo jaitsi, egoera aldrebesa beharginek urtetako burruken ostean lortutako lan baldintzak okertu, hitzarmenik ez negoziatu... eskubideen etenik bako galera.

Egoera honek modu berezian eragiten deutsie kolektibo batzueri, gazte, andrazko eta etorkinek egoera okerragoak ezagutzen dabez, langabezia eta prekarietate altuagoagaz. Diskriminazinoa.

Arratian bizi gura dogu, behar egitetik aparte, bizi. Eta etxebizitza behar dogu horretarako, jabegoan edo alokairuan, baina etxebizitza izateko eskubidea. Ehundaka etxe huts eginda batzuk ezin dabe bat eskuratu, diru faltagatik, ez alokairuan, ez jabegoan. Eta ehundaka lagun dagoz urte luzetako hipoteken kate astunen azpian, bankuen gehigikeria eta diru-gosearen jopuntu.

Arratian bizi dinogunean, beste beharrizan batzuk be ezin ahiztu. Osasungintza eta hezkuntza publiko, doako eta unibertsalak behar doguz, babes sozial duina beharrizan egoetarako eta mugikortasuna bermatuko deuskun garraio publikoa. Inguru txukun eta osasuntsuan bizitzeko eskubidea eta bertakoaren babesa, euskaratik hasita.

Aurrerago dinogu egoera ez dala samurra. Baina ez gagoz prest egoera baltz hau gehiagoko barik onartzeko. Alternatibak egon badagoz, eta eskubideen galeraren aurrean burruka egiteko prest gagoz, erasoari erantzuteaz aparte pertsonak erdigunean ipini eta lanaren eta aberastasunaren bidezko banaketan oinarrituko dan eredu barria eraiki gura dogu.

Hasi baino ez dogu egin bidea, helburu argi baten ostean alkartutako herritarrak gara, eta zenbat eta gehiago izan eta konpromisoa areagotu, errazago bihurtuko dago arratiarrok berton bizi eta behar egin ahal izatea.

Bidelagunak topatzen gabiz, zure ideiak eta beharrerako gogoak behar doguz!

arratianlanetabizi@hotmail.com